Vence pide a dimisión de Feijóo, Rajoy e de De Guindos pola quita ás preferentes

O portavoz nacional do Bloque Nacionalista Galego, Xavier Vence, pediu  a dimisión do presidente da Xunta de Galiza, Feijóo, do presidente do Goberno central, Rajoy, e do Ministro de Economía, De Guindos, ante “o estado de excepción económica e democrática” que supón a quita ás preferentes e participacións subordinadas. En declaracións aos medios, na manifestación que tivo lugar  en Pontevedra defensa das persoas estafadas pola fraude das preferentes, o portavoz nacional cualificou a aplicación da quita, dun mínimo do 43%, como “un golpe democrático ao pobo”, e amosou o rexeitamento máis rotundo do BNG a este saqueo.

Vence criticou que unha decisión de tal gravidade non pasara por ningún debate parlamentar e fora imposta a través dun decreto lei. Por iso insistiu en esixir a dimisión dos responsábeis do saqueo, máxime cando tanto Feijóo como Rajoy incumpriron, de xeito flagrante, todas as promesas dirixidas ás persoas estafadas pola fraude das preferentes. Aludiu, tamén, ao engano reiterado tanto do presidente da Xunta de Galiza como do Goberno central, que demostran camiñar da man da “banca especulativa e depredadora” e non do pobo.

Ademais, o portavoz nacional do BNG advertiu de que as persoas con preferentes e subordinadas sufrirán unha nova quita cando convertan as accións en líquido. Así, sinalou que a gravidade da decisión do Goberno central de roubarlle ás persoas estafadas os seus aforros, a través da quita, xustifica unha insurrección de carácter cívico, non

Vence, que estivo acompañado na mobilización por unha ampla representación do BNG, entre outros, do portavoz parlamentar, Francisco Jorquera, de membros da Executiva Nacional, ou do alcalde de Pontevedra, reiterou o apoio da formación frontista ás máis de 62.000 familias afogadas por esta fraude e anunciou que o BNG defenderá na rúa e nas institucións os dereitos destas persoas a recuperar o 100% dos seus aforros. E é que para o BNG a única solución pasa pola devolución íntegra dos cartos, en liquidez, e non en produtos financeiros.

O BNG denunciou sempre a colaboración e a vista gorda do Banco de España, do Goberno central e da Xunta de Galiza diante desa política agresiva e fraudulenta

Na mesma liña, o portavoz nacional salientou que o BNG sempre se opuxo á fraude e á ilegalidade das preferentes e das subordinadas, que foron colocadas a través da farsa máis vil e con información falaz a persoas que non reunían os requirimentos para soportar estes produtos complexos, así como ás repetidas decisións adoptadas polo Partido Popular e tamén por Bruxelas, que lles quitan os cartos ás persoas aforradoras para saciar o enorme burato da banca. Engadiu que o BNG denunciou sempre a colaboración e a vista gorda do Banco de España, do Goberno central e da Xunta de Galiza diante desa política agresiva e fraudulenta das entidades financeiras.

Por último, Vence aludiu ás indemnizacións e remuneracións exorbitantes dos máximos responsábeis da banca coa complicidade do Banco de España e contrapuxo os privilexios dos que disfrutan os altos directivos co afogo que viven as persoas estafadas. Insistiu en que as quitas exacerban a indignación e a desesperación dos afectados e fixo responsábel a Xunta de Galiza e o Goberno central das consecuencias sociais en que derivará este acto de violencia económica e das eventuais consecuencias que terá para a convivencia das persoas.

Vence: “Agora depende do PP que o prezo da recollida do leite sexa superior aos seus custes”

Xavier Vence agarda que o Partido popular “cumpra o seu compromiso” cos grupos parlamentarios e sindicatos e traslade á Lei que se está a tramitar no Congreso, “a garantía da viabilidade do sector e camiñar cara un marco de negociación”

Na xuntanza das catro forzas políticas galegas e os sindicatos agrarios, o portavoz nacional do BNG dendendeu incorporar a Lei da Cadena Alimentaria un prezo na recollida do leite superior aos seus custes.

O portavoz nacional do BNG, Xavier Vence participou hoxe, xunto ao portavoz do Grupo parlamentario, Francisco Jorquera e a deputada, Tereixa Paz na xuntanza celebrada no Parlamento galego entre os representantes dos sindicatos agrarios galegos e grupos parlamentarios ao fin de trazar as liñas cara a nova Lei da Cadea Alimentaria.

Vence manifestou, “o respaldo do BNG á presentación dunha emenda que garanta un prezo na recollida do leite superior aos custes”.

Neste sentido, engadiu que na actualidade, o sector leitero padece unha grave crise á que hai que sumar “os baixos prezos na recollida do leite” que non superaran os gastos de produción polo que instou ao Partido popular a defender unha emenda á lei que corrixa esta situación.

Vence mostrouse “crítico” cunha lei que invade competencias galegas e mantén un claro “espírito neoliberal” polo que reivindicou “plena soberanía para o Parlamento galego” á hora de lexislar nos mercados agrarios e en particular no mercado leiteiro.

Por outra banda indicou que “pase o que pase coa tramitación desta lei” en Galiza temos que abrir un proceso que “acabe concretando un marco galego de negociación leiteira”.

Unha Lei neoliberal que invade competencias galegas

O portavoz do BNG lembrou que o Presidente da Xunta comprometeuse, no mes de decembro, co sector que esta lei recollería “a fixación de prezos” que garantan cubrir custes, neste sentido, Vence preguntou si Feijóo cumprirá o seu compromiso ou se novamente deixara desamparado ao sector poñendo de manifesto “ a súa falta de peso político no Estado.”

O Sindicato Labrego Galego, Xovenes Agricultores e Unións Agrarias congratuláronse do apoio das catro forzas políticas e o seu compromiso a defender a emenda no trámite parlamentario no Congreso.

Pola súa parte Vence ratificou que tendo en conta a correlación de forzas, do “Partido popular depende que isto prospere”.

O portavoz do BNG reclamou que “a Xunta de Galiza” exerzas as súas competencias e utilice todos os seus instrumentos, como o Consello galego da Competencia para actuar en favor dos gandeiros”.

O BNG pedirá que non se implante o REPAGO nos comedores dos colexios públicos

O BNG do Saviñao presenta unha moción no Concello pedindo que o goberno do PP na Xunta de Galiza non implante un sistema de re-pagamento do servizo de comedor escolar nos colexios públicos. 

O pasado 12 de marzo de 2013 o conselleiro de Educación, anunciaba no Parlamento que unha boa parte das familias que ata o de agora non aboaban taxas polo uso do comedor escolar, deberán empezar a facelo.

Esta decisión carga sobre as precarias economías das familias a obriga de facer fronte ao pago dunha parte importante deste servizo. Un servizo necesario  para garantir un dereito fundamental como é o Dereito á Educación que, con esta imposición do goberno do PP, vén a deteriorar o ensino público no que respecta ao servizo de comedores escolares.

Esta actuación do goberno do PP na Xunta de Galiza evidencia a súa despreocupación polo ensino público, provocando o seu deterioro polos sucesivos recortes dos últimos anos: recortes no número de profesores e profesoras; recortes nos orzamentos dos centros;  recortes nas axudas para libros, nas axudas para bibliotecas, atrasos nas transferencias económicas para comedores escolares, recorte no servizo de comedores, empeoramento das condicións socio-laborais do profesorado, recortes nos servizos de normalización lingüística e unha longa cadea de despropósitos que deterioran un servizo público básico da sociedade.

Pola contra, todos estes recortes no ensino público contrastan cos 240 millóns de subvención ao ensino concertado, cos 3 millóns de euros de subvención para centros que segregan ao alumnado por razón de xénero e que o propio Tribunal Superior de Xustiza de Galiza declarou ilegal.

Feijóo debe cumprir a súa palabra e parar a Área de Xestión Integrada de Lugo

Cosme Pombo lembrou a manifestación, na que máis de 9.000 persoas dos concellos das comarcas de Chantada, Lemos e Quiroga rexeitaron os plans do PP para impoñer a “xestión sanitaria integrada” en Lugo en contra dos servizos do complexo hospitalario monfortino

O deputado do BNG, Cosme Pombo formulou hoxe unha pregunta ao goberno na comisión de sanidade celebrada no Parlamento galego, sobre a intención do Partido popular de eliminar as áreas sanitarias da Mariña e Monforte e que afectará á calidade asistencial de máis de 100.000 persoas.

Na súa intervención, o deputado do BNG instou á Xunta a parar esta medida e manter as áreas sanitarias de Monforte e a Mariña cos actuais servizos sanitarios, “Sr. Feijóo, dixo, cumpra vostede a palabra que lle deu a Monforte”.

Aseamde, deputado pediulle ao director xeral de Asistencia sanitaria que non “desoa” aos miles de persoas que hai uns días percorreron as rúas de Monforte contra a “centralización hospitalaria en Lugo”, foron 9.000 persoas, dixo, as que saíron a rúa para defender a asistencia sanitaria na Mariña e Monforte.

Feijóo incumpre o seu compromiso con Monforte

O nacionalista pediu que o Presidente da Xunta cumpra o seu compromiso coa Plataforma de Defensa da Sanidade Pública de Monforte á que lle transmitiu que o hospital de Monforte “non dependería de Lugo” porque será unha área sanitaria co seu propio funcionamento.

Pombo explicou que o Hospital da Costa ten asignadas máis de 70.000 persoas, distribuídas en 14 concellos e o Hospital Comarcal de Monforte, 50.000 usuarios de 11 concellos, coa nova xestión integrada do Partido popular, afirmou, estas persoas pasarían a ter como hospital de referencia o Hospital de Lugo, “a 100 km de Burela e outro tanto de Monforte”.

Cánto vale a palabra de Feijóo?

A centralización sanitaria prevista pola conselleira de Sanidade, Rocío Mosquera, dixo Pombo, eliminará os investimentos prometidos para os centros de saúde e dos hospitais da Costa e de Monforte, implicará longos desprazamentos de usuarios e facultativos e o persoal deberá inscribirse nas listas de contratación provincial para aceptar contratos a máis de cen km do seu domicilio.

Trala intervención do director xeral de Asistencia sanitaria que confirmou a implantación da Área de Xestión Integrada de Lugo, o nacionalista indicou que na recente manifestación de Monforte nos carteis que portaban os asistentes, na súa maioría xente maior, podíase ler “cánto vale a palabra do Presidente da Xunta?”.

9.000 persoas saen a rúa a defender a Sanidade pública

Para Cosme Pombo, “esas nove mil persoas contan con nove mil razóns para defender a sanidade pública”, os investimentos, servizos como partos e pediatría así como diversas especialidades ás que acoden.

O nacionalista reclamou a ampliación do Hospital da Mariña e lembrou que o anterior xerente, ex- alcalde do Partido popular en Cervo, manifestou “apelo a todos os alcaldes da área sanitaria para defender a sanidade da Mariña e non quedar marcados sempre de ser os corresponsables do seu traslado para Lugo”.

Pombo concluíu a súa intervención reclamando “un cambio de rumbo” na política da consellería de Sanidade e paralizar a centralización da xestión sanitaria integrada en Lugo.

RAZÓNS PARA SEGUIR LOITANDO NA DEFENSA DO NOSO HOSPITAL E A NOSA ÁREA SANITARIA

A día de hoxe somos unha Área Sanitaria con todas as súas competencias, pero de facerse realidade a publicación do Decreto de Estrutura de Xestión Integrada en Lugo, deixariamos de ter AUTONOMÍA DE XESTIÓN, e isto suporía entre outras cousas, as seguintes:

• ·         Perda de orzamentos propios. Teremos os cartos que Lugo nos queira dar.
• ·         Perda de decisión. Faremos o que  mande Lugo.
• ·    Perda daqueles servizos nos que non somos rendibles economicamente, tales como  partos e pediatría.
• ·    Perda de especialidades con un só especialista ao fronte: neuroloxía, endocrinoloxía, reumatoloxía, neumoloxía.

En definitiva, isto vai supoñer o principio da fin do Hospital de Monforte, unha morte lenta e progresiva.

Sabemos que de levarse a cabo esta integración en Lugo, o noso Hospital vai sufrir moito máis co de Burela, xa que nós temos menos poboación (+/-50.000 hab.), menos distancia ao Hospital de referencia ( +/- 60Km) e menor carteira de servizos que Burela.

O BNG propón compensar ao sector leiteiro con cargo á Política Agraria Común

O BNG propón un fondo con cargo á Política Agraria Común que compense ao sector do leiteiro pola desaparición do sistema de cotas en 2015. 

Unha PAC sustentable, que garanta unha alimentación de calidade e fixe poboación ao territorio

O BNG solicita a creación dun fondo de compensación con cargo aos orzamentos da Política Agraria Común (PAC) 2014-2020, que o Plenario da Eurocámara aprobará a próxima semana en Estrasburgo, para compensar ao sector leiteiro pola supresión do sistema de cotas en 2015, que implica unha liberalización da produción que terá unha repercusión negativamente xa nuns prezos do leite moi precarizados.

Baixar de 300.000 a 100.000 € a axuda directa máxima por explotación para evitar que os grandes latifundios acaparen o orzamento da PAC

A contía dese fondo habería que negociala co sector leiteiro, pero debe ter a dobre función de compensar ás explotacións que se endebedaron para adaptarse a un sistema que agora desaparece e, por outro lado, frenar a inestabilidade dos prezos do leite que en Galiza están por debaixo da media estatal e, con frecuencia, por debaixo dos custes de produción, explicaron en rolda de prensa a eurodeputada Ana Miranda durante a presentación da posición do BNG sobre a PAC, xunto coa portavoz de Agricultura, Tereixa Paz.

“Para a distribución dese fondo hai que ter en conta o emprego que xera cada explotación e a función social de fixar poboación ao territorio”, indicou Paz, tras salientar que os gandeiros galegos “compraron cota que agora perde o seu valor con gran carga financeira”.

Tamén propón cambios na distribución das axudas da PAC para que resulten “máis beneficiosas” para o sector agrario galego, posto que a día de hoxe o 20% das explotacións acaparan o 80% do orzamento. En concreto, o BNG defende na Eurocámara que a axuda máxima directa por explotación pase dos 300.000 euros actuais a 100.000 euros.

“Esta medida só afectaría aos grandes terratenentes ou empresas do sector agrario con miles de hectáreas, pero permite aforrar 4.800 millóns de euros que se poden destinar as pequenas e medianas explotacións”, salienta Miranda. Igualmente, o BNG propón non vincular as axudas ao número de hectáreas, que os pagos directos se destinen só a agricultores activos, e apostar por subvencións de ata o 30% para as explotacións que desenvolvan unha agricultura sustentable.

 Incrementos do 25% das axudas para fomentar a incorporación da xente nova á actividade agraria

Para fomentar a renovación do sector, a eurodeputada nacionalista defende que as subvencións para a xente nova que se inicia na actividade agraria sexa un 25% superior durante os dous primeiros anos. Ademais, é preciso “recortar as desigualdades” actuais na distribución de subvencións entre países “ata que non haxa diferencia entre as axudas que recibe un galego, 126 euros por hectárea, ás que reciben a media dos produtores da UE, que ascende a 264 euros”.

O BNG defende a continuidade dos dereitos de plantación ata 2030, porque garantiza unha produción de calidade e de man de obra intensiva para o sector vitivinícola galego, “e o protexe de que empresas foráneas acaparen hectáreas para plantación de uva para un produto de escaso valor engadido e con menor emprego”, salienta.

Paz fixo fincapé a “función social, ambiental e territorial do sector agrario, de aí a importancia do paquete normativo que se aprobará na Eurocámara”.

A Política Agraria Común é, desde o punto de vista orzamentario, a máis importante da UE, e está integrada por un paquete normativo de 4 documentos que serán aprobados a vindeira semana no Pleno do Parlamento Europeo en Estrasburgo. Con eles se marca a folla de ruta para o sector agrario galego para o período 2014-2020.

ABONDA XA DE CORRUPCIÓN E DESTRUCIÓN SOCIAL E CULTURAL. Polo dereito ao traballo, á igualdade, aos servizos públicos e á plena soberanía nacional galega. Por un proceso constituínte e de ruptura democrática.

Facemos un chamamento a participación na manifestación do próximo domingo 3 de marzo ás 12 horas desde a Alameda de Santiago de Compostela.