GALIZA NOVA OPONSE AO ANTEPROXECTO EN MATERIA DE DROGODEPENDENCIAS E OUTROS TRASTORNOS ADITIVOS!

Hoxe Galiza Nova, mocidades do BNG, amosamos a nosa disconformidade a respecto do Anteproxecto de Lei Integral en materia de drogodependencias e outros trastornos aditivos presentado pola Consellaría de Sanidade e anunciamos que presentaresmos alegacións. Na nota enviada á prensa Galiza Nova considera que este anteproxecto d Lei ten un marcado carácter prohibicionista e defendemos que se modifique o texto para que saia do diálogo e a negociacion con todos os axentes implicados, especialmente a xente nova.

Galiza Nova considera que, sendo esta unha Lei tan importante para a sociedade galega, o procedemento seguido para o debate do seu anteproxecto non é o acaido, xa que o prazo para poder facer achegas ou aportacions foi tan só de 15 días dentro dos cais varios non foron hábiles por coincidir coa Semana Santa, restrinxindo a participación dos colectivos sociais implicados.

Ademais este anteproxecto, nas reunións sectorias previas a facelo público, non foi apresentado por escrito feito que imposibilitou que a nosa organización, xunto con outras que asistiron non puideran posicionarse ao respecto, cuestión esta que contradí as declaracións feitas en diversos medios de comunicación pola Consellaría de Sanidade afirmando que contaba co beneplácito de diversos colectivos.

Proxecto de marcado carácter prohibicionista
A respecto do contido do Anteproxecto de Lei consideramos que é un texto cun marcado carácter prohibicionista e que non afronta as cuestións dende un debate amplo, profundo e desprexuizado. No mesmo, adquire especial repercusión o fenómeno do botellón. Dende Galiza Nova cremos que se está a deturpar un fenómeno coma este, magnifícando e culpabilízando a milleiros de mozos/as asociando o ‘botellón’ con problemas que non son nin exclusivos, nin incluso inherentes ao propio fenómeno.

Dende Galiza Nova non podemos aceptar, como aparece no Anteproxecto, a vinculación directa ou a relación causa-efecto que se pretende estabelecer entre o fenómeno do ‘botellón’ e o alcoholismo como problema de saúde pública. O fenómeno do ‘botellón’ dá cabida a mozos e mozas que non consumen alcohol, aos que o consumen responsabelmente e aos que o fan irresponsabelmente. Polo tanto o problema do alcoholismo é independente do lugar, hora ou dos fenómenos nos que se manifeste. Por iso, cremos que as políticas de saúde pública que debe regular a futura Lei, deben ir dirixidas ao consumo de alcohol en xeral, sen asocialo a ningún ámbito ou fenómeno en particular.

Partindo do anterior, para a nosa organización, é evidente que propostas como a limitación de horarios para a venda de alcohol en tendas, a prohibición do seu consumo na rúa e outros espazos, etc… son falsas solucións que só revelan a hipocresía que supón distinguir entre consumos malos e penalizábeis (o do ‘botellón’, por exemplo) e consumos bos e asumidos socialmente (en locais de hostalaría, no ámbito privado,…).

Por todo isto Galiza Nova amosa a súa oposición a este proxecto de Lei e apresentaremos diversas alegacións, do mesmo xeito que procuraremos establecer mecanismos para que estas modificacións e o sentir maioritario da mocidade galega se teñan en conta por parte da Consellaría de Sanidade, para a elaboración da Lei e para que esta poida acadar un maior apoio social e respaldo por parte da mocidade galega.

JORQUERA ADVÍRTELLE AO PSOE QUE "É FUNDAMENTAL CHEGAR A ACORDOS POLÍTICOS PARA TER O APOIO DO BNG"


O deputado do BNG no Congreso, Francisco Jorquera, salientou este serán, despois da xunta mantida co Secretario de Organización do PSOE, José Blanco, o dispór favorábel do PSOE a estudar as propostas plantexadas polo BNG, en concreto a posibilidade de formar grupo parlamentar con outras forzas políticas. “Hai unha actitude positiva por parte do PSOE pero ten que traducirse en feitos”, advertiu.


Jorquera sinalou que se tratou dunha “entrevista fructífera, na que se falou con franqueza á hora de expór os criterios para a negociación da composición da Cámara e da investidura”. Subliñou o dispór “construtivo e colaborador do BNG co Goberno” pero “é fundamental chegar a acordos políticos”. Ademáis de remarcar que “hoxe non se pechou ningún acordo, expuxéronse os temas e emprazámonos para novos contactos”.


Os criterios fundamentais do BNG para a negociación

Francisco Jorquera explicou que lle trasladou ó Secretario de Organización do PSOE, José Blanco, os criterios fundamentais para o BNG na negociación: “a Mesa da Cámara Baixa ten que reflexar o carácter plural da Cámara xa que ningunha forza política obtivo a maioría absoluta o 9 de Marzo”. Neste sentido, salientou o decisivo das forzas nacionalistas, sobre todo “das que conformamos Galeuscat xa que imos ser chave na vindeira lexislatura, decisivos na articulación de maiorías parlamentares e isto debe ter reflexo na Mesa do Congreso”.


Afirmou que tamén debe o PSOE facilitar unha “leitura flexíbel do Regulamento da Cámara para que diferentes forzas políticas poidamos conformar grupos e dar solución á situación do Grupo Mixto que actualmente é de dubidosa viabilidade”. “Demandamos ao PSOE que contribúa a realizar unha leitura aberta do Regulamento para que o Grupo Mixto actual poida subdividirse”. Neste sentido, desvelou aos medios de comunicación que o BNG recibiu propostas de case todas formacións que integran o Mixto para formar grupo, “non descartamos ningunha”, aínda que destacou que as posibilidades máis claras, por razóns regulamentarias, son con Nafarroa Bai ou con Coalición Canaria.


A perguntas dos xornalistas, Jorquera indicou que o voto do BNG para a investidura “depende do diálogo emprendido porque avaliaremos toda a resultante no seu conxunto”.


Posición ante a votación de José Bono como Presidente do Congreso

O deputado do BNG deixou claro que o candidato a Presidente da Cámara Baixa “non reúne o perfil idóneo” e engadiu que “non cremos que o mellor xeito sexa o de pór enriba da mesa a un candidato que ten unha actitude sectaria e hostil para coas forzas nacionalistas, ademáis de afán de protagonismo e un ánimo polémico. Desde logo, non reúne as características para un cargo dese estilo”. Máis, puntualizou, o BNG “ten por norma non facer vetos a candidatos doutros partidos políticos aínda que non gostemos da figura de Bono”.


En resposta ás perguntas dos xornalistas, Francisco Jorquera enfatizou que o BNG aínda non adoptou unha posición respecto á votación de José Bono como Presidente do Congreso porque “todo está suxeito ao feito de que a Mesa da Cámara reflicta a pluralidade e ó feito de que se dea unha resposta satisfactoria á subdivisión do Grupo Mixto, a que se permitan formar grupos distintos do Grupo Mixto. Se hai unha resposta afirmativa a todo isto o BNG votará a favor”. Engadiu que no caso contrario os nacionalistas galegos se absterían na votación de José Bono.

A CÁMARA GALEGA RESPALDA UNHA PNL DO BNG PARA RECLAMAR DO MINISTERIO DE INDUSTRIA A COBERTURA TOTAL DA BANDA LARGA ANTES DE FIN DE ANO

O Parlamento galego aprobou unha iniciativa do BNG para instar á Xunta a dirixirse ao Ministerio de Industria para dar cumprimento a obriga legal deste departamento de achegar a extensión da banda larga (PEBA) a toda a poboación galega antes do 31 de Decembro deste ano.

A Cámara respaldou unha proposición non de lei nacionalista, logo de ser transacionada con enmendas do PP e o PSdeG, pola que tamén se demanda que a calidade do servizo do PEBA sexa igual para as zonas rurais que o servizo ofertado no ámbito urbano, é dicer, con largos de banda de 1,3 ou 10 MB e, en ningún caso, inferior a 1 Mb.

Asemade, o texto aprobado tamén fai referencia a que o prezo que se ofreza dentro do PEBA sexa igual ao que se ofrece nas zonas urbanas e que se estableza só atendendo ás prestacións recibidas.

Blanco Parga recoñeceu que a situación é mellor que no 2003 mais considera que é preciso pór de manifesto as insuficiencias actuais, pois en Xaneiro desta ano, segundo os seus dados, Telefónica –adxudicataria do Plan en Galiza- recoñeceu que aínda quedan sen cobertura nesta País 1.764 núcleos.

O deputado explicou que esta cifra, ademais, é algo “ficticia”, pois hai que analizala tendo en conta que para Telefónica un núcleo está cuberto cando afecta ao 80 por cento da súa poboación, polo que fica arredor do 20 por cento sen posibilidade de contratación de Internet, concretamente o 24 por cento en A Coruña, o 16 por cento en Lugo, o 12 por cento en Ourense e o 23 por cento en Pontevedra.

Para o parlametar do BNG, aos problemas de cobertura hai que engadir os de calidade, onde tamén hai eivas que cómpre correxir, pois as tecnoloxías empregadas: ADSL Rural, Wimax e Satélite dan un servizo de 512 Kb no cado do ADSL rural e só de 265 KB coas outras tecnoloxías.
“Como se pode comprobar –dixo- este servizo dista moito do que se dá nos núcleos urbanos, onde é posíbel contratar 1 MB, 3Mb, 6MB e mesmo 10Mb, e tamén nos prezos hai diferencias importantes”.

Blanco Parga lembrou que no século XXI Galiza non se pode quedar atrás nas infraestructuras de comunicación, que tamén son fundamentais para o desenvolvemento, polo que considera que o Ministerio, xa que ten competencias plenas, mude substancialmente criterios e requisitos técnicos e de prezos.

O PARLAMENTO GALEGO ELIXE A PÉREZ BOUZA SENADOR DO BNG POR DESIGNACIÓN AUTONÓMICA


O Parlamento galego elexiu hoxe a Xosé Manuel Pérez Bouza como senador do BNG por designación autonómica, nun pleno extraordinario onde foi aprobada a proposta acordada en Xunta de Portavoces, malia os votos nulos do Partido Popular.


O portavoz do BNG, Carlos Aymerich, advertiu aos populares que “o PP vai por un lado mentres a sociedade vai por outro” e acusounos de tentar xerar unha polémica ficticia coa súa demanda de ter dous senadores, lembrando que a legalidade establece e ampara o reparto dun por formación política.


Para Aymerich, o PP quere trasladar á Cámara galega un problema interno, resolver os “compromisos do señor Feijóo”, que ten que decidir entre Manuel Cabezas e Manuel Fraga, mais esta cuestión nada ten a ver realmente coa elección de senadores, dixo.


O portavoz nacionalista salientou que coa eleición de Pérez Bouza Galiza vai ter voz de seu no Senado e asegurou que a sociedade do País está satisfeita con esta decisión, incluso xente non votante do BNG

O BNG MANTERÁ ESTE MÉRCORES "A PRIMEIRA XUNTA FORMAL" CO PSOE E AS NEGOCIACIÓNS VAN TER DÚAS FASES

O deputado do BNG, Francisco Jorquera, afirmou este mediodía nos corredores do Congreso que “na negociación co grupo socialista, o BNG vai ter moi en conta que dispór existe a facer unha interpretación aberta do Regulamento para permitir a constitución de Grupos parlamentares e evitar que o Grupo Mixto sexa un totum revolutum”.
“Imos ter moi en conta se a composición da Mesa da Cámara reflexa o pluralismo real, se reflexa o papel relevante que as minorías nacionalistas imos ter, se hai unha actitude de respecto á pluralidade da Cámara e polo tanto, unha actitude aberta a arranxar a situación do Grupo Mixto”· Neste sentido, lembrou que existen precedentes de leituras abertas do Regulamento da Cámara.
Jorquera explicou que mañá mesmo manterá a primeira xunta formal co grupo socialista e que as negociacións co BNG “van ter lugar en dúas fases”. Unha primeira na que se negociarán aspeitos que afectan ao Regulamento do Congreso, á presidencia da Cámara, á composición da Mesa da Cámara, e “poremos enriba da mesa a necesidade de permitir a subdivisión do Grupo Mixto”. Nunha segunda fase, indicou, “entraremos nunha rolda de conversas de cara a definir posicións na votación para a investidura”.
Advertiu que o BNG vai entablar unha negociación e tomará posición en función da resultante tras a negociación final. Recalcou a importanza de arranxar a situación do Grupo Mixto porque “un Grupo Mixto integrado por sete forzas políticas non é un grupo operativo, é necesario unha leitura aberta do Regulamento para arranxar isto”.
Jorquera sinalou que non hai novidades ao respecto e que “mantemos interlocución co resto das formacións que integrarían o Grupo Mixto”. Engadiu que “estamos a estudar diversas fórmulas”. Para o deputado nacionalista “é básico que se permita que distintas forzas políticas se agrupen de cara a conformar grupos, e que haxa dous grupos no canto dun só. Eso é polo que avogamos. O Grupo Mixto exixe un tratamento singular que redundaría nun mellor funcionamento da Cámara. A primeira proposta que facemos é que se poidan constituir dous Grupos parlamentares”.

O BNG APOIA AS DEMANDAS DOS PRODUTORES DE LEITE



Os nacionalistas galegos lamentamos que o Ministerio de Agricultura apoiase en Bruxelas o incremento liñal da cota desouvindo as demandas do sector leiteiro galego.


Contra o incremento lineal da cota de produción
Nesa liña, o BNG lamenta que o goberno español veña de apoiar o incremento lineal da cota de produción leiteira que vén de ser aprobado en Bruxelas. Este incremento do 2% para todos os estados manterá a desigualdade e a discriminación histórica que sofre o noso país no reparto de cota. Cómpre destacar, neste senso, que a cota de produción de leite no Estado español, cuxo prinicipal produtor é Galiza, apenas cubre o 66% da demanda interna, mentres outros Estados teñen asignada unha cota de producción de leite moi superior ás suas necesidades de consumo. Deste xeito o Estado español terá que seguir importando leite do doutros estados da Unión Europea mentres Galiza segue tendo unha cota moi inferior ás suas capacidades de producción.


O BNG manifesta o seu malestar por que a Ministra de Agricultura, ao apoiar un incremento liñal e a futura desaparición do sisema de cotas, necesario para a regulación do sector , desouviu non só as demandas do sector leiteiro galego senón tamén un pronunciamento unánime do Parlamento Galego.

Estas medidas sumanse á modificación dos criterios de reparto da reserva nacional, desouvindo a demandas do sector de manter os criterios de reparto vixentes en 2005 que priorizaban o acceso á mesma das pequenas explotacións, para que puidesen dimensionarse e seren competitivas, atendendo á sua importante función social e medioambiental, evitando a desertización do medio rural e contribuíndo á preservación do territorio.

O novo sistema, denuncia o BNG, fixo que ficase sen repartir cota da reserva nacional mentres explotacións galegas non puideron acceder a incrementos de cota.

Apoio ás políticas de Medio Rural

A xuizo do BNG, estas políticas, unida á baixada abusiva dos prezos por parte de industrias leiteiras con centros de decisión en Madrid están a introduzir incertidume e desestabilización nun sector básico para o porvir do agro galego. A executiva do BNG lamenta que desde o Estado non se colabore coas medidas positivas para o sector que está a impulsar a consellaría de Medio Rural, presidida polo nacionalista Alfredo Suárez Canal.

O BNG lembra que este departamento está a actuar como mediador permanente entre a industria e os produtores, apostando pola introdución da transparencia no mercado do leite.
Algunhas das medidas tomadas nesta dirección son a criación da mesa do leite -Galiza é a única comunidade con este órgano- ou o observatorio do sector lácteo como marco de referencia para os prezos.
Estas políticas impulsadas polo nacionalismo desde o goberno galego serviron para conseguir a equiparación entre os prezos que se pagan aos productores galegos e os do resto do Estado, corrixindo o diferencial existente que facia que os produtores galegos cobrasen 2,5 das antigas pesetas menos por litro.

NA EMIGRACIÓN "GAÑA SEMPRE O PARTIDO QUE CONTROLA O APARATO ESTATAL"

O Bloque Nacionalista Galego denuncia que o voto do CERA (Censo Residentes Ausentes) continúa a ser un “escándalo antidemocrático” e salienta que na emigración “gaña sempre o partido que controla o aparato estatal”.

“Non é moi presentábel en termos democráticos que sistematicamente o partido que controla o aparato do Estado no exterior sexa o que arrase nas eleccións na diáspora. Antes o PP, agora o PSOE. Cambia o poder no Goberno, cambia automaticamente a correlación de forzas entre os dous partidos estatais. Iso non é hixiénico nen moi apresentábel. Iso indícanos até que ponto se trata dun voto condicionado polo poder, un voto emitido en condicións que non son de recibo”, afirma o coordenador executivo do BNG, Francisco Jorquera.

Estamos perante unha nova edición dun auténtico escándalo antidemocrático. Os responsábeis de que continúen a chegar sobres con votos de persoas que xa faleceron son o PP e o PSOE por se negaren a modificar a lexislación electoral e por non teren a vontade política suficiente para darlle dignidade ás condicións en que se exerce o dereito ao sufraxio desde o exterior”, considera o deputado electo do BNG ao Congreso. “Está claro que non reformaron a lei porque uns e outros se teñen beneficiado dela sen o menor escrúpulo e a sabendas de que garante todo tipo de irregularidades”, engade.

O BNG vai facer valer os seus “votos decisivos” en Madrid para que isto mude de vez na nova lexislatura estatal. “Imos condicionar calquera hipótese de colaboración co PSOE á hora de formar maiorías parlamentares a que se revise a lexislación electoral de xeito que se garanta a limpeza de todo o proceso de votación do CERA”.

A reforma –que non só debe traducirse na depuración do censo e en que se vote en urna, senón que tamén debe entrar a determinar o alcance do dereito ao sufraxio- debe producirse durante a próxima lexislatura. “Non podemos tolerar que este escándalo antidemocrático dure un minuto máis”, afirma Jorquera.

VIVENDA DUPLICA AS AXUDAS DE VIVENDAS EN ALUGUER


A Consellaría de Vivenda e Solo, que dirixe a nacionalista Teresa Táboas, duplica as axudas aos propietarios que aluguen a súa vivenda a través do Programa de Vivenda en Aluguer. Nese sentido, a Consellería concederá unha subvención de ata 12.000 euros a fondo perdido para a rehabilitación e execución de obras de mellora de vivendas cuxos propietarios desexen incorporalas ao Programa, o que supón un incremento do 100% con respecto á subvención concedida ata o de agora que era de ata 6.000 euros.


O obxectivo é dar novos incentivos aos propietarios e intentar reducir a diferencia entre a demanda e a oferta do Programa de Vivenda en Aluguer, xa que a día de hoxe hai máis solicitudes que vivendas ofertadas. Este incremento da subvención destinada aos propietarios é unha das principais modificacións do novo Decreto que modifica o Programa aprobado hoxe polo Consello da Xunta, e que incorpora novas vantaxes para propietarios e inquilinos.


No que atinxe aos inquilinos, a modificación do Programa de Vivenda en Aluguer amplía o ámbito de posibles persoas beneficiarias da subvención ao arrendamento, ao incrementar o nivel máximo de ingresos que poden percibir os demandantes de vivenda en aluguer a través deste Programa. En concreto, os ingresos ponderados máximos pasan a ser de ata 3 veces o IPREM, de tal xeito que poderán ter acceso as persoas cuns ingresos de entre 4.695 €/ano – 0,7 veces IPREM – e 20.121 €/ano – 3 veces IPREM –, cando no anterior Decreto 48/2006 os inquilinos non podían superar uns ingresos ponderados de 2,5 veces o IPREM – 16.768 €/ano –.


Vantaxes para propietarios e inquilinos

Desde a súa entrada en vigor, en febreiro de 2006, o Programa de Vivenda en Aluguer ten financiado o aluguer de 3.400 persoas e unidades convivenciais. O obxectivo da Consellería de Vivenda e Solo é subvencionar unha media de 4.500 alugueres anuais, dinamizando o mercado de aluguer e mobilizando a vivenda baleira con garantías para os propietarios, poñendo as vivendas a disposición das rendas con máis dificultades a través de alugueres subvencionados. Nos orzamentos de 2008 a Consellería de Vivenda e Solo destina unha partida de 9 millóns de euros ao Programa de Vivenda en Aluguer.


A través deste Programa a Consellería encárgase de adxudicar as vivendas acomodando ao máximo as características das mesmas, tanto en superficie como en prezo, coas necesidades e os ingresos do inquilino, da familia ou da unidade convivencial que solicite unha vivenda. Ademais, os inquilinos acceden a unha vivenda a un prezo moi inferior ao do mercado, e non necesitan negociar co propietario para efectuar reparacións ou melloras de servizos, xa que a vivenda que recibe ten as condicións de habitabilidade garantidas, porque de non ser así non é aceptada no Programa.


Pola súa banda, os propietarios que inclúan a súa vivenda no Programa de Vivenda en Aluguer teñen garantido o cobro da renda do aluguer durante 5 anos tras asinar o primeiro contrato, incluso se o inquilino deixa a vivenda. Ademais, xunto coa subvención a fondo perdido de ata 12.000 € para obras de rehabilitación, os propietarios son beneficiarios dun seguro multirrisco do fogar, e reciben asistencia e defensa xurídica gratuíta

OUTRO ANO MAIS O ESCÁNDALO DO VOTO EMIGRANTE

Finalmente foron 20.000 votos os emitidos polos emigrantes. O que representa case o 10% do censo da provincia. Ese censo de votantes só o temos na cidade de Lugo. O resto dos concellos da provincia non chegan a esas cifras. E seguen aparecendo partidas de defunción dentro dos sobres de votación! Esa é a súa democracia. Nós xa esiximos a súa reforma nos primeiros seis meses desta nova lexislatura para que nas eleccións galegas o resultado sexa real. Por certo, que se este censo, o CERA, contase, na provincia de Lugo escolleríanse 5 deputados no canto de catro, e un deputado/a sería o do BNG. Por iso o PP e o PSOE prefiren que se manteña este escándalo.

209.042 RAZÓNS PARA DICIR GRAZAS GALIZA


O Bloque Nacionalista Galego obtivo 209.042 votos o 9 de Marzo, 209.042 votos para dicir grazas Galiza. Foi un “éxito eleitoral” e unha “boa noticia para Galiza” –en palabras de Francisco Jorquera- en pleno “bombardeamento bipartidista”. O BNG foi a única forza nacionalista que no Estado incrementou os seus apoios en percentaxe de voto e en números absolutos.

O balanzo dunha campaña eleitoral haino que facer en función dos obxectivos propostos. O BNG cumpriu todos e cada un deles. Incrementou o número de votos e a percentaxe e fixo recuar o PP, impediu que se fose cara a un escenario de maiorías absolutas e e obtivo un espazo moi valioso para Galiza nas próximas Cortes Xerais do Estado, un espazo que en moitos momentos da xa inminente novena lexislatura estatal resultará decisivo para formar maiorías.

O resultado do BNG pon ademais de manifesto que en Galiza o bipartidismo é inviábel e, por tanto, que Galiza ten un mapa político proprio e xenuíno do país, o que en termos políticos equivale a dicer que Galiza se comportou o 9 de Marzo como a nación que é.

En Galiza hai tres proxectos políticos perfeitamente diferenciados e hai un espazo político nacionalista absolutamente consolidado, que responde aos intereses do país con independencia de que tipo de elección se trate. Isto último é un logro histórico de enormes proporcións para o pobo galego.

Nada disto tería sido posíbel sen a entrega e a enorme implicación da militancia do Bloque Nacionalista Galego na campaña. “O nacionalismo non ten limites. Hoxe ficou demostrado”, afirmou o coordenador executivo, Francisco Jorquera na noite eleitoral. “Síntome tremendamente orgulloso de ser o portavoz nacional dunha organización como o Bloque Nacionalista Galego, chea de xente que ama o seu país por enriba de todo”, manifestou Anxo Quintana na súa comparencia perante os meios na noite do 9-M, cando xa era unha evidencia o avanzo eleitoral do BNG.

O BNG MAIS FORTE EN MADRID!

"Como vaticinamos, nun resultado sen maiorías
absolutas, os votos do BNG serán decisivos"
O portavoz nacional do BNG, Anxo Quintana, fixo esta noite a valoración dos resultados eleitorais por parte do Bloque Nacionalista Galego que significan “un aumento de votos con respeito a hai catro anos, un aumento porcentual no ámbito de Galiza e no do Estado español”.
En vista deste resultado o BNG dixo que “temos que amosar a nosa satisfación co resultado acadado. Resultado non só do BNG, senón que o panorama que se presenta é favorábel a participación do nacionalismo con carácter decisivo no ámbito estatal”.

“Nesta lexislatura”, continuou, “o BNG vai ser decisivo en moitas ocasións en Madrid e nós podémonos comprometer hoxe a que cada vez que sexa decisivo, o BNG vai repercutir en beneficios para os cidadáns galegos”.
O líder nacionalista destacou o feito de que se dea un panorama “como nós vaticinamos, sen maiorías absolutas e no que os votos do BNG serán decisivos en moitas ocasións e iso vai ser en beneficio de Galiza e os galegos e galegas”.

O portavoz nacional quixo aproveitar a ocasión para felicitar ao Partido Socialista e amosou o seu convencemento de que “o resultado democrático que os cidadáns deparan terá que ser tamén positivo para o conxunto do Estado”.
Anxo Quintana trasladou na súa intervención “o noso inmenso agradecemento a todos os cidadáns que optaron polo Bloque Nacionalista Galego porque son milleiros de persoas as que optaron polo BNG nunha situación difícil, unha campaña pensada para dous, pensada para consolidar o bipartidismo, na que se quixo excluír a Galiza. Mesmo nesa situación, milleiros de cidadáns optaron polo BNG e por colocar a Galiza no panorama político do Estado”.
Tal e como explicou o líder do Bloque, “sabemos que non era fácil. O fácil nesta campaña era optar polas dúas grandes forzas políticas estatais, pero é evidente que existen milleiros de cidadáns que, sobre todo e ante todo pensan en Galiza”.
O portavoz nacional dirixíuse a estes cidadáns para dicer: “pódolles asegurar que non se van arrepentir. Durante catro anos van ter moitas ocasións para felicitarse pola súa decisión porque comprobarán que a presenza do BNG en Madrid que eles hoxe nos outorgan cos seus votos vai ser positiva para Galiza e poderán ver representada o que foi a súa vontade e os seus desexos”.

O portavoz do Bloque quixo tamén “felicitar de todo corazón aos militantes, compañeiros e compañeiras do BNG” e asegurou sentirse “tremendamente orgulloso de ser o portavoz nacional desta organización política”. Son centenares de persoas que en toda Galiza fixeron un esforzo sobrehuman para poder conseguer este resultado. Grazas ao seu esforzo o BNG é case a única forza política que sube en votos e en porcentaxe, excluíndo ás dúas grandes forzas estatais”.

Condena enérxica do terrorismo

O Bloque Nacionalista Galego quer expresar a súa máis enérxica condena perante o execrábel asasinato de Isaías Carrasco, tiroteado hoxe por un terrorista de ETA.
O BNG transmite as súas condolenzas aos familiares e achegados desta nova vítima mortal de ETA, así como a súa solidariedade ao Partido Socialista, do que Isaías Carrasco era militante.
O BNG vai suspender todos os actos programados para o último día de campaña, como testemuño da súa repulsa perante a barbarie terrorista e como tributo solidario en homenaxe a Isaías Carrasco.
A violencia terrorista repugna a conciencia de todos os demócratas e ofende tamén a conciencia profundamente pacifista do pobo galego. A miseria moral do terrorismo representa un intolerábel atentado contra os dereitos humanos máis elementais e obriga a todas as forzas políticas democráticas, a todos os pacifistas, a manter unha acción unitaria e a non facer uso político nen eleitoralista da violencia.
Este é o momento da unidade entre os demócratas o momento da fortaleza do Estado de Dereito e da democracia fronte a iniquidade dos terroristas.
Un portavoz do BNG vai asistir esta mesma tarde ás 18.00 horas no Congreso a unha reunión das forzas políticas democráticas para analizar a situación criada tras este execrábel atentado.

Acto peche de campaña de Galiza Nova en Lugo Sur

Acto peche de campaña de Galiza Nova en Lugo Sur

O VENRES 7 DE MARZO, ÁS 21H NO BAR RL
de Duquesa de Alba en Monforte de Lemos.
TEREMOS:
FESTA-PANCETADA
O viño, pan e panceta corre pola nosa conta!!!
As gañas de festa polas ti.
esperámoste!

Coa forza da mocidade
Galiza decide
Vota BNG



ADEMAIS XA SABES, SE QUERES + INFORMACIÓN: http://www.galizanovalugosur.blogspot.com/

A Marcha Mundial dás Mulleres recorrerá a prohibición que lles impide manifestarse o día 8

Cualifican a decisión de "inxusta" e recrimínanlle ao Goberno que non utilice a mesma lei para “para prohibir as misas”, pois “o episcopado leva máis de seis meses en campaña, pedindo o voto.
A Marcha Mundial dás Mulleres ten previsto presentar un recurso contencioso administrativo contra a prohibición de celebrar concentracións reivindicativas no Día Internacional da Muller, o próximo 8 de marzo, data que coincide coa xornada de reflexión para as eleccións xerais do domingo.

Despois de que a subdelegación do Goberno en Galiza fixera pública hoxe a prohibición dos actos previstos para este día, a portavoz do colectivo en Pontevedra, Pilar Álvarez, expresou o "cabreo" da organización ante esta medida, que cualificou como "inxustiza".

Pese a non ter a intención de "desobedecer" a prohibición, reivindicou o dereito do colectivo a "estar na rúa, non quedar caladas en casa" e non van a " renunciar a colocar símbolos feministas" na mesma data e lugar onde estaba prevista a concentración.

A resolución emitida pola subdelegación baséase nunha sentenza do Tribunal Superior de Xustiza de Madrid sobre un caso "idéntico", segundo a cal "históricamente as concepcións feministas foron abandeiradas por opcións políticas concretas". No entanto, admite que "aínda que a manifestación non ten finalidade electoral, considera que a barreira entre o político e o social é moi tenue".

Que prohiban tamén as misas

Para Pilar Álvarez, resolucións coma estas tamén "poderían facelas para prohibir as misas", pois criticou que "o episcopado leva máis de seis meses en campaña electoral, pedindo o voto explícitamente para unha determinada opción política".

Así mesmo, quéixase de que "tampouco están prohibidos actos institucionais" como os convocados polas deputacións, os Consellos Municipais da Muller "ou Esperanza Aguirre en Madrid -presidenta desta autonomía, que pertence a un partido", engade.

A representante da Marcha Mundial dás Mulleres relacionou a violencia de xénero coa "invisibilización e ninguneo" deste colectivo". "Non deixarnos saír á rúa é un xeito de facernos seguir no papel de aturar", explicou Pilar Álvarez.

A PROVINCIA DE LUGO TAMÉN DEBATE

Hoxe pola noite, a TVG , emite o debate dos cabezas de lista ao Congreso por Lugo. Mellor dito, de todos non, porque Pepe Blanco non vai estar. Aparecer non vai aparecer, pero insiste desde Madrid en pedir os votos dos veciños e veciñas da provincia Lugo. Fronte a súa ausencia e a volta ao pasado que nos trae o PP, alí vai estar o BNG para meter a nosa provincia no debate. Nós non queremos a crispación, senón poñer riba da mesa propostas de futuro e alternativas galegas, para Galiza e para os concellos da nosa provincia. No BNG non queremos que en Madrid sigan tocando de oído nos asuntos que nos afectan.

Abraira: "O BNG é a máquina de autoestima de Galiza"




Paz Abraira pediulle á cidadanía que votase "en clave galega"


A cabeza de lista do BNG ao Congreso pola provincia de Lugo, Paz Abraira, afirmou o sábado nun mitin no Saviñao que o Bloque Nacionalista Galego é “a máquina de autoestima de Galiza” que está a facer nesta campaña que os galegos e galegas se sintan “orgullosos de si mesmos”. “Somos esa máquina de autoconfianza que permitir que a partir do 9 de marzo a provincia de Lugo conte cunha voz nacionalista no Congreso dos Deputados, esa máquina de autoestima que vai facer que os lucenses e as lucenses aposten desta volta polo BNG para ter presenza política propia en Madrid”, dixo a candidata nacionalista diante dunhas 200 persoas, que encheron o Auditorio de Escairón.






Paz Abraira, que pediu aos cidadáns da provincia de Lugo que o 9 de marzo voten “en clave galega”, afirmou que o BNG conseguiu “rachar o xogo a dous entre o PP e o PSOE” e facer que Galiza estea no debate desta campaña. “O BNG é o garante de que Galiza e a provincia de Lugo estean sobre a mesa, de que na negociación dos Orzamentos se teña en conta ao noso país, de que as políticas que se adoptan en Madrid non sexan contrarias aos nosos intereses”, argumentou a cabeza de lista do BNG ao Congreso.




En compañía da Responsable Local do BNG Antía Rodríguez, do alcalde de Monforte e número 2 da candidatura do BNG ao Congreso, Severino Rodríguez, e do director xeral de Xuventude da Xunta de Galiza, Rubén Cela, a candidata nacionalista pediu o apoio da mocidade, como xa fixera pola tarde nun acto con mozos e mozas e Meira. Paz Abraira pediulles aos mozos e mozas lucenses que sexan “o motor do despertar da provincia de Lugo”. Un argumento no que tamén insistiu Rubén Cela, que destacou que son moitas aínda as decisións que se toman en Madrid polo que os mozos e mozas lucenses xóganse “o seu futuro” o 9 de marzo. Pediulles que se impliquen en favor do BNG “para que os seus problemas sexan escoitados en Madrid a través de Paz Abraira”.


Apoio para que a Ribeira Sacra sexa declarada Patrimonio da Humanidade
A candidata nacionalista mostrou tamén no Saviñao o seu apoio para que a Ribeira Sacra sexa declarada Patrimonio da Humanidade e ofreceuse para apoiar en Madrid esta declaración. Anunciou tamén que unha das condicións que porá o BNG ao próximo presidente do Goberno será que se destinen á provincia de Lugo 1.200 millóns de euros na vindeira lexislatura para axilizar “infraestruturas pendentes”, como o desdobramento do corredor Lalín-Chantada-Monforte.